Otoñal

OTOÑAL

¿Qué tendrán las tardis
en la sementera,
que ni paici qu'egüelin las floris,
que ni pica el rejón de la abeja,
ni canta ya el cucu,
ni ves en la sierra
rejilal los berezus, las jaras,
canchalís y pieras,
que nos paici se queman sin lumbrí
ni jumo siquiera?

¿ Qué tendrán las tardis
en la sementera.
que toitas las cosas te paicin
vestías de tristeda?

Ni los mozus hablan
de toru y de fiesta,
ni bailan las mozas
con garbu y presteda,
ni los viejas te cuentan sus cosas,
ni te pairan de todu las viejas...

Toitu está tristi
en la sementera...
Idin que los añus
tamien tienin penas,
se muerín igual que los hombris
allá en Nochebuena.

Son comu muchachus,
en la primavera;
y en atoñu barruntan la muerti
que vieni, que llega.

Por esu en las tardis
de las sementeras
toitas las cosas se muerin
andiquiera te encuentras tristeda.

José María Vecino Martín: Flores y abrojos